جَانِي مرْسُولْ وَعْلِيهْ لَعْيُونْ بْكَاتْ .....///..قصيدة زجلية تكشف الستار عن الذئاب الرومنسة بقلم الزجال المغربي نبيل بن عبد السلام بخات

جَانِي مرْسُولْ وَعْلِيهْ لَعْيُونْ بْكَاتْ .....///..قصيدة زجلية تكشف الستار عن الذئاب الرومنسة بقلم الزجال المغربي نبيل بن عبد السلام بخات

 جَانِي مِرْسُولْ

 وَعْلِيهْ لَعْيُونْ بْكَاتْ

حِينْ سْمَعْتْ مَنُّو خْرَايِفْ لَوْقَاتْ

قالْ شِي كْلاَمْ عْلَى لْبْنَاتْ

أُو قَالْ أَنَا مَرْسُولْ فِيكْ النُّوبَة اليُومْ جَاتْ

طْرِيقْ الحُّبْ طْوِيلَة فِيهَا لْيُومْ تْبَاتْ

أَنَا مَرْسُولْ الحُّبْ وَالمَحْبُوبَة لِيكْ رَسْلاَتْ

قُلْتْ يَا المَرْسُولْ

نُورْ الحُّبْ كَانْ فْ شَمْعَة أُو طْفَاتْ

سْبَابْهَا نَاسْ بْزْوَاقْ الدُّنْيَا سْهَاتْ

المَحْبُوبَة عْلَى قْلُوبْ كْثِيرَة زَعْمَاتْ

الحُّبْ يِتْبَرَّى عْلِينَا أُو عْلِيهْ كَدْبَاتْ

يَاااااا المَرْسُولْ رَاكْ جَايِبْ خْرَايِفْ لَوْقَاتْ

نَفْسِي يَانَفْسِي أَشْ قَالُو عْلِيكْ لَبْنَاتْ

قَالُو وَحْدَة فِيكْ تْغَرْمَاتْ

يَااااااااا نَفْسِي لاَ تْتْعَجَّبْ فْ سُنَّة لْحَيَاةْ

لُونْ يِعْجَبْ العِينْ وَسْطْ لْوَانَاتْ

مَنْظُورْ فْ يُومُو أُو بَعْدُو وَقْتُو فَااااااتْ

يَا العُشَّاقْ شَمْسْ نْهَارْكُمْ رَاه شَرْقَاتْ

قْلُوبْ مَايْتَا فْ قْلُوبْ حَيَّة جَرْحَاتْ

يَا المرسُولْ الرَّسْلاَكْ عَنْدْهَا حْكَايَاتْ

مْدَادْ قْلاَمِي يِشْهَدْ فِيهَا شْهَادَاتْ

يْقُولْ مَنْهَا قْلُووووبْ تْخَدْعَاتْ

خْبَارْهَا فْ سُوقْ الحُّبْ شَاعَاتْ

وَقْلوبْ مَنْسِيَّة مَنْهَا تْشَكَّاتْ

جَاوَبْنِي المَرْسُولْ أُو قَالْ شِي كَلْمَاتْ

يَا الشَّاعِرْ أشْ قَولَكْ فْ المْصَاحْبَاتْ

قُلْتْ هَذِي عْشُوبْ فْ أَرْضْ العَرْبِي لَقْحَاتْ

جَابْهَا هْوَى غَرْبِي وْ أَرْضْنَا لِيهَا عَشْقَاتْ

بْكَاتْ عَيْنِي عْلَى الوَرْدْ اللِّي فِيها كَبْرَاتْ

خْيَارْ النَّاسْ وَصْحَابْ الهمَّة بِيهَا تَبْلاَاتْ

عْشُوبْنَا الغَاليَا حْكَايْتْهَا تَنْسَاتْ

المرْسُولْ قَالْ فْ كْلاَمَكْ حِكْمَة وْمَعْناتْ

قُلْتْ يَا المَرْسُولْ لَعْقُولْ النْقِيَّة رَاه فَهْمَاتْ

قَالْ أَشْ تْقُولْ عْلَى مُولاَ وْلِيدَاتْ

قُلْتْ حَيْرَانْ وَ المَعيشَة عْلِيهْ غْلاَاتْ

الفَقِيرْ أُو الغَانِي يْعَانِو فْ الحَيَاةْ

النُورْ عْلِيهُمْ طْفَى أُو طْرِيقْهُمْ ظَلْمَاتْ

سَّرْ المَحْنَى فْ كْتَابْ العِبَاداتْ

النَّاسِيه الخَيْرَاتْ مَنُّو هَرْبَاتْ

وَ البَاقِي مَنْ لْيَامُو فْ المَحْنَاتْ

يَا المَرْسُولْ

فْ الحُّبْ نَعْطِيكْ كَلْمَاتْ

بِيهْ ذْيَابْ كْلاَتْ لْحَمْ أُو مَا عَفَّاتْ

بْالحُّبْ الزْرِيبَة تْهَلْكَاتْ

وَالذْيَابْ الطَّاغْيَة مزَالْ مَاشَبْعَاتْ

يااااا المَعْنِي عْذَرْنِي عْلَى هَاذْ الصّفَاتْ

نَاسْ كْثِيرَة بْالحُّبْ تْصَايْدَاتْ

أُو فْ بْحَارْ النْدَامَة غَرْقَاتْ

دْمُوعْ الشَّمْتَة فْ عْيُونْهُمْ جَرَّاتْ

مَالْقاتْ وْجُوهْ اللِّي عَرْفَاتْ

وْمَا نَفْعَتْ النْدَّامَة اللِّي نَدْمَاتْ

يَااااا النَّاسْ لِيَامْ العَزْ لِينَا تْوَحْشَاتْ

جَارِي يَا  جَارِي بَنْتَكْ فِينْ مْشَاتْ

يَا سِيدِي العَيْنْ شَافَتْهَا خَرْجَاتْ

وَالدْمُوعْ بَالوَادْ مَنْ عِينِي نَزْلاَاتْ

يَا المُوتْ وَقْتَاشْ يْقُولُو بُوهَا مَاتْ

يَا سِيدِي لْسَانْ مَحكُومْ بْالشَّعْوَدَاتْ

نَاسْ مَا تَرْحَمْ فْ الدُّنْيَا بْالرْجَالْ لَعْبَاتْ

لَحْمِي مَرْضَاتْ وْصُورْتِي تْشَوْهَاتْ

مَرْضِي مَنْ مَرْتِي أُوالشُّوهَا مَنْ وْلاَدِي بْنَاتْ

قٌلْتْ يَا المَرْسُولْ فْ عَلْمَكْ زِيدْ هَاذْ لَحْكَايَاتْ

قَالْ يَا المَجْدُوبْ عْلَى الُّدنْيَا زِيدْنِي كَلْمَاتْ

قُلْتْ الدُّنْيَا للنَّاسْ ضَحْكَاتْ

أُو وْجُوه النْسَّا  تْزَوْقَاتْ ا

لدَّرْوِيشْ شَمْعتُو طْفَاتْ

وَ الغَانِي مْحَيْنُو كَثْرَاتْ

بَنْتْ اليُومْ تَغْوَاتْ

وَالعَزْرِي هْمُومْ عْلِيهْ نَزْلاَتْ

عْيُونْ الرْجَالْ بْالزْمَانْ بْكَاتْ

وَقْلُوبْ الْنْسَّا بْالدُّنْياَ فَرْحَاتْ

جَانِي مِرْسُولْ ....الزجال المغربي نبيل بن عبد السلام بخاتْ

تذكير

 

جميع الحقوق الملكية محفوظة



التعليقات


استضافة مجانية من موقع مدونات عبر! | الموقع غير مسؤول عن محتويات المدونة، فقط صاحب المدونة يتحمل كامل المسؤولية عن مضامينها | التبليغ عن مخالفة | سياسة الخصوصية |نسخة الموبايل