مَعْنَى وَكْلاَمْ ../ الحوار الزجلي الأول بين الزجال نبيل بن عبد السلام بخات والزجالة زينب أوليدي 26/03/2015

مَعْنَى وَكْلاَمْ ../ الحوار الزجلي الأول بين الزجال نبيل بن عبد السلام بخات والزجالة زينب أوليدي 26/03/2015

يَازَيْنَبْ  قُلْ لِي كَلْمَة فْ سْطُورْ بَنْتْ يُومْها

مَنْ حْوَالْ النَّاسْ صْنَاعْ عُنوَانْهَا

 

ڭري  يا  حروفْ  نساَ

ڭري  بلي  كاين

داخلت عليك

بحروف  لهجاَ

ڭري  راه... لا جهدْ

إلا جهد لْمعاني

منڭب بالصفا وللغَا

مهووس بِ لْبوح

غير داوي

 صَوْتِي يَتْرَجَّى فْ الوَاحِدْ الوَهَّابْ

لْسَانِي يِتْهَجَّى عْلَى النَّاسْ لَغْرَابْ

وَالفَاهَمْ يِفْهَمْ كْلاَمِي المَصْوَابْ

 يَازَيْنَبْ القََلْبْ مَاتْ وَ الظَّنْ خَابْ



يا لي قرصو الزمان بحالي

دير ما دارت مجدوبة الغيوان

سرق من ليام فتيلة

شعلها كل ليلة عطفة حنينة

تتفاجى لهوال

ويتعدل الحال

تفكر ما داز من سوايع خليلة

يجيك الظن ف سيفة

الشمش ضاوية ف عش الحليلة


 

 نْخَافْ نَقَلدْ المَجْدُوبَة

وَنْخَلِّي صُغْرِي يَكْلُو الجِيعَانْ

نْخَافْ مَنْ خْرُوجِي لاَ يِتْسَّادُ لْبيبَانْ

نْخَافْ مَنْ صْحَابِي لاَ يْكُونُو عدْيَانْ

 

وريه وريه ولا عاند خليه

الولد لخير دير النية وبات مع الحية

الا الصحاب عادو عديان

الزمان زمانهم والغدر ساسهم

خلي لحرف متاوي لكفوف

خليه صافي بلا خوف 

 

بْغِيتْ نَفْسِي تْكُونْ قوَّمَة

وْفْبحُورْ ظَالْمَة عَوَّمَة

أَشْ نْدِيرْ

رَنِي فْ سُوقْ مَا فِيه زِينْ مَسْرُورُ

نَاسْ فْرَاشْهُمْ لَحْصُورْ يْبِيعُو عْلِيه الزُّور 

 

لكلمة هم ثقيل

شكون يهز ما يحافي

ما يترشى ما يرش

لا ذهب لا لويز لا هذا خويا عشير

لكلمه

ونجوم الليل شكون

لاَ تَنْسَى اللَّه العَظِيمْ الغَفُورْ

كُلْ مَنْ بْعِيدْ عْلَى طَاعْتُو يْعِيشْ مَدْبُورْ

كُلْ مَنْ طَاعُو يَبْقَى فْ حِفْظُو مَستُورْ


من حقي نحلم

على قدي نبغيني نجمة في عيون لغزلان

ضاوية تحث ڭدامي في مرايتي

نبقا في صباغتي

سعدي مرجان معصر زهر من لمحال


حْلَمْ كِيفْ مَاحْلَمْتْ أنَا

حْلَمْتْ الدُّنْيَا للنَّاسْ ضَحْكَاتْ

أُو وْجُوه النْسَّا تْزَوْقَاتْ

الدَّرْوِيشْ شَمْعتُو طْفَاتْ

وَ الغَانِي مْحَيْنُو كَثْرَاتْ

 

وحق لي زارع في لعروق روح

حتى تهدات من لقرص هذ لحروف

خوذوا مني هذ الروح

بخروها برياح النسيان

خليوها حمامة بيضه عشها

على فم لقصيده تبيض بيضه

في لعشوبيضه في متاني الحروف

مجلة الأقلام المغربية

تعزيز الثقافة المغربية من أقلام إلى فكر ونقد /حِكم/ شعر/ زجل/ قصص /خواطر/مقالات .. للراغبين في التسجيل بالمجلة فما عليهم إلا المراسلة عبر البريد الإلكتروني : magazine.maroc@gmail.com أو الإتصال بالإدارة (+212)0651011935



التعليقات

  1. إبوركي يوسف علق :

    حوار زجلي شيق جدا... تحياتي الخالصة للمبدعين الأشاوس


استضافة مجانية من موقع مدونات عبر! | الموقع غير مسؤول عن محتويات المدونة، فقط صاحب المدونة يتحمل كامل المسؤولية عن مضامينها | التبليغ عن مخالفة | سياسة الخصوصية |نسخة الموبايل